Der ÄKW-Büttenmarsch

Un wenn d’r Deuvel och op Stelze kütt

Den Büttenmarsch anhören:

1. Strophe
Em Rheinland ess jetz widder Karneval
dröm simmer widder do op jeden Fall.
mir schunkle doch am Rhing von Hätze jähn,
jetzt jet et los, jawohl Herr Kapitän.
Nur kostümet mir tredde op d’r Plan,
wä jarnix hätt, dä kütt als Irrlesch an.
Doch wä d’rheim noch an aal Urjel hätt,
dä schnapp sich die un singk bejeistert met.

Refrain:
Un wenn d’r Deuvel och op Stelze kütt,
die Schwaz un Wieße klemme en de Bütt.
M’r bränge Wetz, m’r mache Klaaf,
Wurringe Alaaf.

2. Strophe
Alaaf! Dä Wurringer Karneval es do,
dann es Schwaz-Wieß d’rbei dat weßt ehr jo.
M´r nähle op de Trumm bis dat se platz,
un söke uns he hück ne neue Schatz.
Nur prima Schökkelwasser drinke mir,
un kruvve dann no Huus op alle Vier.
Doch lang m’r halde et nit us em Bett,
am andere Dag m’r singe widder nett.

Refrain:
Un wenn d’r Deuvel och op Stelze kütt,
die Schwaz un Wieße klemme en de Bütt.
M’r bränge Wetz, m’r mache Klaaf,
Wurringe Alaaf.

3. Strophe
Manche Paejas säht, seht ens die Buuren,
die sollen sich dat Spell ens he beluuren.
Et mäht d’r allerkleinste Wurringer Pans,
em Fastelovend inne Konkurenz.
He wäht dä Fasteleer janz neu saneet,
dä ahle Knies wed endlich fottraseet.
M’r mache he ne Deckel op dr Pott,
se krije uns nitt, se krije uns nitt kapott.

Refrain:
Un wenn d’r Deuvel och op Stelze kütt,
die Schwaz un Wieße klemme en de Bütt.
M’r bränge Wetz, m’r mache Klaaf,
Wurringe Alaaf.

Musik: Christian Meurer
Text: Willi Esser
(1948/49)